Patëm kënaqësinë dhe nderin të bisedojmë në studio me një mysafir të veçantë nga Kosova – Kryetarin e Komunës së Vitisë, z. Sokol Haliti, një drejtues me përvojë të gjatë institucionale, aktualisht në mandatin e tij të katërt, dëshmi e besimit qytetar, profesionalizmit dhe vizionit të qëndrueshëm për zhvillimin e komunës.

Z. Haliti ndau me ne një vizion të qartë dhe një strategji shumë profesionale për zhvillimin e Komunës së Vitisë, duke prezantuar projektet e realizuara deri më tani, si dhe planet konkrete për të ardhmen. Një theks i veçantë iu kushtua projekteve të planifikuara në fushën e biomasës, të cilat pritet të mbështeten edhe nga Bashkimi Evropian, si pjesë e politikave për energjinë e ripërtëritshme, zhvillimin e qëndrueshëm dhe ekonominë e gjelbër.

Gjatë bisedës u trajtuan gjithashtu tema të rëndësishme si qeverisja lokale, transparenca, bashkëpunimi institucional, zhvillimi i bujqësisë, arsimit dhe investimeve, si dhe roli i pazëvendësueshëm i diasporës në zhvillimin lokal.

Vizita zyrtare e z. Haliti në Austri dhe takimet e zhvilluara me përfaqësues të komunave të Kapfenbergut dhe Grazit, si dhe pjesëmarrja e tij në Konferencën Evropiane për Biomasën, dëshmojnë angazhimin serioz për ndërtimin e partneriteteve afatgjata dhe shkëmbimin e përvojave evropiane në dobi të komunës së Vitisë.

Në përfundim, i urojmë z. Sokol Haliti shumë suksese në realizimin e projekteve dhe në zhvillimin e mëtejshëm të Komunës së Vitisë, me bindjen se vizioni dhe strategjia e tij do të sjellin përfitime konkrete për qytetarët dhe brezat e ardhshëm.

Moderator:

Fatos Kryeziu, M.A.